Vill ekki sýna fram á endurgreiðslu til Hauks

Guðlaugur Þór Þórðarson, heilbrigðisráðherra, hyggst ekki verða við beiðni Vísis um að framvísa rafrænni kvittun sem sýni endurgreiðslu hans til Hauks Leósonar vegna veiðiferðar í Miðfjarðará í ágúst á seinasta ári.

Líkt og Vísir greindi frá í síðustu viku fóru Guðlaugur Þór, Vilhjálmur Þ. Vilhjálmsson, Haukur Leósson og Björn Ingi Hrafnsson í veiði í Miðfjarðará í ágúst í fyrra. Fram hefur komið að á sama tíma var Baugur með öll veiðileyfi árinnar á leigu. Haukur segir að hann hafi greitt Baugi 480 þúsund fyrir þrjú veiðileyfi og boðið Guðlaugi, Birni Inga og Vilhjálmi að þiggja þau.

Það hefur einnig komið fram að Haukur fékk þessi veiðileyfi á verulegum afslætti frá Baugi.

Vilhjálmur og Björn Ingi þáðu boð Hauks. En Guðlaugur segist sjálfur hafa endurgreitt Hauki kostnaðinn við ferðina.

,,Ég setti það viðmið fyrir rúmlega 20 árum þegar ég byrjaði í stjórnmálum að þiggja aldrei boðsferðir frá fyrirtækjum og hef staðið við það og mun að sjálfsögðu gera það áfram," segir Guðlaugur og bætir að að hann hafi einungis verið að þiggja boð Hauks vinar síns þegar hann ákvað að fara með í ferðina.

,,Hinsvegar þegar ég fór yfir það seinna vildi ég geta sagt að ég borga alltaf fyrir mínar veiðiferðir en eins og menn þekkja geta veiðiferðir verið nokkuð viðkvæmar."

Aðspurður hvort ekki sé eðlilegt að hann framvísi kvittun sem sanni að hann hafi í raun endurgreitt Hauki svarar Guðlaugur.

,,Ég hef aldrei beðið um kvittun þegar að ég er að eiga viðskipti við vini mína. Ef menn trúa mér ekki þá get ég eiginlega ekkert gert við því."

Guðni Ágústsson, formaður Framsóknarflokksins, skoraði á Guðlaug í Síðdegisútvarpi Ríkisútvarpssins á mánudaginn að framvísa kvittunum í tengslum við umrædda veiðiferð sem sýni að hann hafi greitt sjálfur fyrir ferðina. Guðlaugur segist ekki ætla að eltast sérstaklega við ummmæli Guðna.

,,Ég veit ekki hversu langt maður eigi að opna heimilisbókhaldið," segir Guðlaugur sem ekki vill skapa fordæmi með því að verða við beiðni Vísis um að framvísa rafrænni kvittun.