Sigurjón hafði aðstöðu hjá Nýja Landsbankanum

Sigurjón Þ. Árnason, fyrrum bankastjóri Landsbankans, er hvorki með aðstöðu né aðgang að húsnæði eða gögnum Nýja Landsbankans. Aftur á móti hafði Sigurjón afnot af húsnæði bankans fyrstu vikurnar eftir starfslok hans. Þetta kemur fram í tilkynningu frá Nýja Landsbankanum.

,,Að gefnu tilefni vill Landsbankinn (NBI hf.) taka fram að fyrrverandi bankastjórar koma ekki á neinn hátt að rekstri bankans, né hafa þeir aðstöðu eða aðgang að húsnæði og gögnum bankans.

Sigurjón Þ. Árnason hafði afnot að húsnæði í Pósthússtræti á fyrstu vikum eftir formleg starfslok hans og á þeim tíma var hann m.a. skilanefndinni til upplýsingagjafar.

Vert er að taka fram að eftir að NBI hf. tók til starfa var Lögfræðisvið bankans, sem áður var til húsa í Pósthússtræti 11, flutt í Austurstræti. Öll aðstaða var þó fyrir hendi og bankinn enn bundinn af leigusamningi," segir í tilkynningunni.