Ingimundur: Við viljum vinna gull

„Mér líður auðvitað yndislega. Annars er erfitt að tala því það eru svo miklar tilfinningar innan í manni í augnablikinu. Mér líður frábærlega og við erum búnir að koma okkur í frábært tækifæri. Fyrr skal ég dauður liggja en að láta þetta tækifæri mér úr greipum renna," sagði varnartröllið ógurlega Ingimundur Ingimundarson sem á stóran þátt í þessum lygilega árangri handboltalandsliðsins í Peking.

„Það er allt búið að vera í ótrúlega góðu standi. Undirbúningur og allt saman er ótrúlega markvisst. Þetta er bara búið að vera geðveikt. Nú eru það bara Frakkarnir. Af hverju eigum við ekki að geta unnið þá eins og hina? Búnir að vinna heimsmeistarana, gera jafntefli við Evrópumeistarana, erum komnir í úrslitaleik hér. Við þurfum að undirbúa okkur áfram vel og þá eru okkur allir vegir færir. Við viljum skrá okkur á spjöld sögunnar og vinna gull. Það eru ekki margir sem fá tækifæri til þess," sagði Ingimundur.