Landin sá til þess að Ísak og Guð­mundur fengju silfur

Þeir Guðmundur Bragi Ástþórsson og Ísak Gústafsson áttu sinn þátt í að koma Ringsted í úrslitaleikinn í Herning, þar sem íslenska landsliðið lék einmitt í undanúrslitum og um brons á EM fyrir skömmu.

Þeir unnu Sönderjyske í undanúrslitum í gær, 35-32, á 23 ára afmælisdegi Ísaks, en í úrslitaleiknum í dag voru yfirburðir Aalborg miklir og lokatölurnar 34-24.

Hinn 37 ára gamli Niklas Landin, sem var svo sigursæll með danska landsliðinu, var valinn maður leiksins jafnvel þó að hann spilaði bara fyrri hálfleikinn.

Það er vegna þess að Landin nánast lokaði markinu og var með 56,52% markvörslu! Hann varði sem sagt 13 af 23 skotum sem hann fékk á sig.

Þessi tröllaframmistaða hafði í för með sér að Aalborg var 21-10 yfir í hálfleik og sigurinn í raun í höfn. Leikmenn Ringsted gáfust þó ekki upp og unnu seinni hálfleikinn með einu marki.

Guðmundur Bragi skoraði úr eina skoti sínu í leiknum og átti tvær stoðsendingar. Ísak átti þrjár stoðsendingar en skoraði hins vegar ekki úr neinu af sex skotum sínum í dag.