FH sneri leiknum og sigraði Sel­foss

Liðin skiptust á að taka forystuna fyrst um sinn en undir lok fyrri hálfleiks steig Selfoss skrefinu fram úr. FH var þó aldrei langt undan og jafnaði leikinn nokkrum sinnum, en var að jafnaði marki eða tveimur frá Selfyssingum.

Leikurinn snerist síðan FH í vil þegar Garðar Ingi Sindrason fiskaði víti og rautt spjald á Valdimar Örn Ingvarsson. 

Valdimar var rekinn af velli með sína þriðju brottvísun og tveggja marka forysta Selfyssinga hvarf snögglega. Garðar Ingi er frændi Arons Pálmarssonar, sem var á hliðarlínunni í kvöld í fyrsta sinn sem aðstoðarþjálfari FH. 

Daníel Freyr Andrésson átti mikilvægar vörslur á þeim tímapunkti og gaf síðan stoðsendingu í markinu sem kom FH yfir í fyrsta sinn síðan í fyrri hálfleik.

Á lokamínútunum héldu heimamenn gestunum frá sér og tókst að stækka forystuna. Lokatölur 33-30.

Símon Michael Guðjónsson var markahæstur hjá FH með 9 mörk en Garðar Ingi Sindrason var stoðsendingahæstur með 5 stoðsendingar, auk þess að skora 6 mörk.

Hannes Höskuldsson var markahæstur hjá Selfossi með 9 mörk en Tryggvi Sigurberg Traustason gaf 7 stoðsendingar.

FH komst með þessum sigri upp í annað sæti deildarinnar og er nú með eins stigs forskot á Hauka. Selfoss situr hins vegar í 8. sætinu.