Sigurður Ragnar: Ætlum okkur áfram

Sigurður Ragnar Eyjólfsson landsliðsþjálfari í knattspyrnu var hvergi banginn þó svo að Ísland hafi dregist í erfiðan riðil í EM í Finnlandi sem fer fram næsta sumar.

Ísland er í riðli með heims- og Evrópumeisturum Þýskalands sem og Noregi og Frakklandi.

„Mér líst mjög vel á þetta en það er óhætt að segja að þetta sé erfiður riðill. Hann hefði varla getað verið erfiðari. Við fengum þrjár af fjórum sterkustu þjóðunum en það vantaði bara Svíþjóð. Þetta eru liðin sem eru í öðru, sjötta og sjöunda sæti heimslistans."

„En við ætlum okkur áfram. Við höfum unnið Frakkland áður og getum gert það aftur. Það er langt síðan við mættum Noregi en þar hafa átt sér ákveðin kynslóðaskipti stað og því ágætur tímapunktur til að mæta þeim. Það verður svo líka gaman að mæta heims- og Evrópumeisturunum enda gaman að mæta þeim bestu."

Ísland mætir fyrst Frakklandi en síðasti leikurinn í riðlinum verður gegn Þýskalandi. Miðað við yfirburði Þjóðverja í þessari keppni er ekki ólíklegt að liðið verði þá búið að tryggja sér sæti í fjórðungsúrslitunum en Þýskaland hefur unnið EM í síðustu fjögur skipti.

„Það er samt ómögulegt að segja hvort að það sé gott eða slæmt að mæta Þjóðverjum í síðasta leik. Það getur allt gerst í þessum leikjum enda öll liðin sterk. Maður veit aldrei hvernig þetta gæti þróast."

„Við höfum verið að leggja drög að undirbúningi okkar fyrir mótið og við munum hefja æfingar á næsta ári og leika talsvert af undirbúningsleikjum. Við höfum hingað til vanið okkur á að fara í alla leiki til að vinna þá og ætlum ekki að breyta því nú. Ég er því hvergi banginn."