Heimamenn úr leik á ÓL

Heimamenn Kínverjar féllu í dag úr leik í knattspyrnukeppninni á Ólympíuleikunum þegar þeir töpuðu 3-0 fyrir Brasilíumönnum. Thiago Neves (2) og Diego skoruðu mörk Brasilíumanna.

Kínverjar þurftu nauðsynlega að vinna leikinn til að eiga von á að komast áfram í fjórðungsúrslitin, en þeir áttu aldrei möguleika á sigri í dag.

Belgar lögðu Nýsjálendinga 1-0 og mæta Ítölum í 8-liða úrslitunum. Kamerúnar, sem gerðu markalaust jafntefli við Ítali, mæta Brasilíu í næstu umferð.

Nígeríumenn eru sömuleiðis komnir þangað eftir 2-1 sigur á Bandaríkjamönnum sem léku 10 frá þriðju mínútu eftir að Michael Orozco var rekinn af velli.

Hollendingar komust áfram með 1-0 sigr á Japönum og mæta Ólympíumeisturum Argentínu í 8-liða úrslitunum. Argentínumenn lögðu Serba 2-0 í dag og þá unnu Fílstrendingar 1-0 sigur á Áströlum með marki Salomon Kalou og mæta Nígeríu í 8-liða úrslitunum.