Slóvakía? Slóvenía? Hann er örugglega fínn dómari

Harry Redknapp, knattspyrnustjóri Portsmouth, var allt annað en ánægður með dómara leiks sinna manna gegn Braga í UEFA-bikarkeppninni í gær.

Portsmouth tapaði leiknum, 3-0, sem fór fram í Portúgal. Slóvakinn Darko Ceferin dæmdi leikinn og gaf tveimur leikmönnum Portsmouth gult spjald auk þess sem hann dæmdi mark Papa Bouba Diop ólöglegt vegna brots.

„Strax frá byrjun leiksins fannst mér eins og að dómarinn væri glórulaus og hafði enga hugmynd um hvað hann væri að gera. Það var í raun ógnvekjandi," sagði Redknapp eftir leikinn.

„Hvaðan er hann? Slóvakíu? Slóveníu? Ég er viss um að deildin þar sé góð og að hann hafi dæmt fullt af stórum leikjum," bætti hann við.

Honum fannst leikmenn Braga komast upp með leikaraskap hvað eftir annað á meðan að hart væri tekið á sínum mönnum.

„Þeir spiluðu vel og unnu leikinn en mér fannst leikmenn detta með miklum tilþrifum í hverri einustu tæklingu. Þetta var slakur leikur."