Milosevic kvaddi með tveimur mörkum

Markahrókurinn Savo Milosevic spilaði í kvöld sinn fyrsta og síðasta landsleik fyrir Serbíu. Hinn 35 ára gamli framherji skoraði tvö mörk og klúðraði tveimur vítum í leiknum.

Serbar unnu 6-1 stórsigur á Búlgörum í vináttuleik í kvöld sem segja má að hafi verið sérstakur heiðursleikur fyrir Milosevic.

Hann átti að baki fjölda landsleikja fyrir Júgóslavíu og síðar Serbíu og Svartfjallaland en leikurinn í kvöld var hans fyrsti og síðasti fyrir Serbíu.

"Tilfinningarnar báru mig ofurliði í vítaspyrnunum, en það var frábært að kveðja með tveimur mörkum," sagði Milosevic, sem á sínum tíma spilaði m.a. með Aston Villa á Englandi.

Hann skoraði 37 mörk í 104 landsleikjum á ferlinum. Hann á eftir að spila einn deildarleik á leiktíðinni með meistaraliðinu Rubin Kazan í rússnesku deildinni - en svo er fastlega reiknað með því að hann leggi skóna endanlega á hilluna.