Heiðar tryggði Íslandi sigur á Möltu

Heiðar Helguson skoraði eina mark leiks Möltu og Íslands sem fram fór ytra í dag. Sigurmarkið kom á 66. mínútu leiksins.

Heiðar Helguson kom íslenska liðinu eftir að hann nýtti sér mistök í varnarleik andstæðingsins. Varnarmaður Möltu skallaði boltann að eigin marki og var Heiðar fyrstur að átta sig og kom boltanum í markið.

Markalaust var í fyrri hálfleik en íslenska liðið byrjaði betur í leiknum og átti Aron Einar Gunnarsson til að mynda skot að marki sem fór naumlega fram hjá. Emil Hallfreðsson átti einnig ágætt skot beint úr aukaspyrnu sem markvörður Möltu varði.

Ólafur Jóhannesson gerði svo tvær breytingar í hálfleik. Gunnleifur Gunnleifsson fór af velli í skiptum fyrir Árna Gaut Arason og þá kom Pálmi Rafn Pálmason inn fyrir Veigar Pál Gunnarsson.

Bæði lið vildu fá vítaspyrnu í upphafi hálfleiksins en ekkert var dæmt. Þá átti Heiðar ágætan skalla en hann missti marks. Skömmu síðar skoraði hann svo eina mark leiksins.

Eftir markið róaðist leikurinn talsvert enda þjálfarar beggja liða duglegir að skipta inn varamönnum sínum. Bæði lið fengu þó ágæt færi undir lokin en besta færi heimamanna kom í uppbótartíma. Þá slapp leikmaður inn fyrir íslensku vörnina en Árni Gautur sá við honum.

Byrjunarlið Íslands:

Markvörður:

Gunnleifur Gunnleifsson

Varnarmenn:

Birkir Már Sævarsson

Hermann Hreiðarsson, fyrirliði

Sölvi Geir Ottesen

Indriði Sigurðsson

Miðvallarleikmenn:

Arnór Smárason

Helgi Valur Daníelsson

Veigar Páll Gunnarsson

Aron Einar Gunnarsson

Emil Hallfreðsson

Framherji:

Heiðar Helguson