Símun gæti orðið fyrsti færeyski Íslandsmeistarinn

Það er gríðarlegu áhugi í Færeyjum fyrir lokaumferð Íslandsmótsins í knattspyrnu á morgun. Símun Samúelsen getur orðið fyrsti færeyski knattspyrnumaðurinn sem verður Íslandsmeistari í knattspyrnu.

Áhuginn er svo mikill að það eru nokkrir færeyskir blaðamenn væntanlegir til landsins í dag til að fylgjast með leiknum í Keflavík á morgun.

Fjölmargir Færeyingar hafa leikið með liðum hér á landi en hingað til hefur engum þeirra tekist að lyfta Íslandsmeistaratitlinum. Símun hefur verið lykilmaður í liði Keflavíkur undanfarin ár og er nú í bullandi séns.

„Það er nú samt ekkert komið enn," sagði hann í samtali við Vísi. „Það er ekki víst að ég verði sá fyrsti en auðvitað stefni ég að því. Ég er jákvæður fyrir þessum leik og gott að þetta er enn í okkar höndum. Við ætlum að klára þetta með stæl."

Keflavík mætir Fram á morgun og sigur tryggir liðinu Íslandsmeistaratitilinn. Liðið má gera jafntefli eða tapa en þá þurfa úrslit leiks FH og Fylkis að vera liðinu hagstæð.

Símun segir að það sé mikið fylgst með íslenska boltanum í Færeyjum. Þeir séu líka oft að metast við íslensku deildina.

„Um leið og Færeyingum finnst þeir gera betur á einhverjum vettvangi knattspyrnunnar eru þeir duglegir að segja frá því. En svo heyrist ekkert þegar að hitt gerist. Þeir vilja með betri deild hjá sér en á Íslandi þó að það sé vissulega ekki svo í dag," sagði Símun.

Hann segir að það ríki mikil spenna fyrir leikinn á morgun. „Það kemst ekki mikið annað að en knattspyrna þessa dagana. Maður er hættur að geta hlustað á eitthvað annað umræðuefni - það kemst bara ekkert annað að," sagði hann í léttum dúr.

„En það er ljóst að Fram er með gríðarlega gott lið. Við vitum þó hvað við getum gert á heimavelli og ætlum að klára þennan leik."