Óttaðist hið versta eftir klúður áratugarins

Chris Iwelumo átti von á að verða tekinn af lífi af félögum sínum í liði Wolves þegar hann sneri aftur til æfinga með liðinu eftir fyrsta landsleikinn sinn á laugardaginn.

Skelfingarsvipur framherjans þrítuga prýddi síður margra blaða á sunnudaginn eftir að hann klúðraði ótrúlegu dauðafæri sem hefði geta tryggt Skotum sigur á Norðmönnum.

"Ég óskaði þess svo heitt að mánudagurinn kæmi strax, því ég vildi ljúka því af að fá háðsglósurnar frá félögum mínum eftir þetta," sagði Iwelumo í samtali við Daily Mail.

Honum til mikillar undrunar sýndu félagar hans honum frekar samúð en að stríða honum.

"Þetta var ósköp rólegt og ég er viss um að strákarnir hafi vorkennt mér. Ég vissi að þeir yrðu ekki of grimmir við mig, því þetta eru góðir strákar. Ég fékk nokkrar litlar pillur - en ekkert of alvarlegt," sagði framherjinn.

Sum bresku blaðanna sýndu honum ekki jafn mikinn skilning. Eitt þeirra birti mynd af tveggja ára gömlu barni, ömmu og hundi - og nefndi tók þar dæmi um menn og málleysingja sem skorað gætu í opið mark af þriggja metra færi. 

Talað er um atvikið sem klúður áratugarins og kannski ekki af ástæðulausu.