Markmið West Ham að lækka launakostnað

Ásgeir Friðgeirsson, varaformaður enska úrvalsdeildarfélagsins West Ham, segir í samtali við Vísi að það sé markmið félagisns að minnka hlutfall launakostnaðar af heildarútgjöldum félagsins.

Fram kemur í ársskýrlu Deloitte um fjármál knattspyrnuheimsins að launakostnaður West Ham hafi aukist um tæpar þrettán milljónir punda á sama tíma og tekjur félagsins minnkuðu um tvær milljónir punda. West Ham kemur verst út í slíkum samanburði við önnur félög sem léku í ensku úrvalsdeildinni tímabilið 2006-7.

„Það hefur verið fjallað um það oft í fjölmiðlum að það eru fyrst og fremst samningar sem voru gerðir á síðasta ári sem útskýra þetta. Um er að ræða samninga við menn eins og Lucas Neill, Scott Parker, Freddie Ljungberg og Matthew Upson."

Hann vill þó ekkert segja um hvort að það hafi borgað sig. „Ég get ekki metið það til fulls enda eru þetta leikmenn sem eiga eftir að leika hjá okkur í 6-8 ár. Þetta var talið eðlilegt á sínum tíma en samningarnir voru gerðir á verðbólgutíma er varðar laun leikmanna í ensku deildinni. Ég held að það sé aðeins að ganga til baka núna. En markmiðið var að styrkja liðið og það tókst enda vorum við aldrei í fallbaráttu á síðasta tímabili og liðið endaði í tíunda sæti deildarinnar sem eru viðunandi. Þar að auki eru allir þessir leikmenn í framtíðaráætlunum félagsins."

„Stefnan er þó sú að lækka hlutfall launa af heildarútgjöldum félagsins. Það gerist fyrst og fremst á leikmannamarkaðnum í sumar og þar hefur ekkert átt sér stað til þessa."

Eggert Magnússon var stjórnarformaður West Ham þegar að áðurnefndir samningar voru gerðir. Hann hætti í því starfi í desember síðastliðnum og Björgólfur Guðmundsson tók við stjórnarformennsku. Hann keypti einnig hlut Eggerts í félaginu og varð um leið eini eigandi félagsins.

„Eggert hafði umboð til að gera þessa samninga en ég get engu til svarað um annað er hann varðar. Þegar Björgólfur tók yfir allt félagið var hluti að því að hann sjálfur yrði stjórnarformaður."

Ásgeir segir að minnkun tekna félagsins eigi sér eðlilegar útskýringar. „Það eru tiltölulega stöðugar tekjur í fótboltanum. Um er að ræða fyrst og fremst tekjur af beinum útsendingum í sjónvarpi og ársmiðasölu. Einn viðbótarleikur í sjónvarpi getur fært félaginu 400-500 þúsund pund í tekjur. Árið á undan komst West Ham alla leið í úrslit bikarkeppninnar sem færði félaginu fleiri sjónvarpsleiki og þar með meiri tekjur. Það eru þessar sveiflur sem hafa fyrst og fremst áhrif á tekjurnar."

„En þetta er mjög stöðugur og traustur rekstur. Menn þurfa að fara gætilega í það að efla og styrkja liðið og ná þar með betri árangri og fleiri sjónvarpsleikjum. Það gerist fyrst og fremst með hægri og öruggri uppbyggingu."