Stefán Þórðarson íhugar að hætta í fótbolta

Stefán Þórðarson, leikmaður ÍA, íhugar nú að hætta í knattspyrnu vegna þeirra rauðra spjalda sem hann hefur fengið í síðustu tveimur leikjum sínum.

Stefán fékk fyrst að líta rauða spjaldið gegn Keflavík í fjórðu umferð vegna tveggja áminninga. Hann missti af leik ÍA og Fylkis en var svo aftur í byrjunarliði ÍA gegn HK í gær.

Þar fékk hann umsvifalaust að líta rauða spjaldið eftir viðskipti sín við Stefán Eggertsson, leikmann HK. Dómari leiksins, Einar Örn Daníelsson, sá ekki atvikið en vísaði Stefáni af velli eftir að hafa ráðfært sig við annan aðstoðardómara leiksins.

„Við vorum að kljást um boltann og dómarinn var vel staðsettur," sagði Stefán í samtali við Vísi. „Ég stíg svo á manninn og ætla ekkert að reyna að fela það. En það var enginn illur ásetningur á bak við það. Ég var að reyna að vinna boltann og steig bara niður til jarðar."

„Hins vegar taldi línuvörðurinn sem var hinu megin á vellinum að það hafi verið illur ásetningur þar að baki. Svo var ekki enda er ég ekki í fótbolta til að meiða menn," sagði Stefán.

„Þetta er áfall fyrir mig. Ég verð að fara í algera naflaskoðun og athuga hvað sé í gangi, annað hvort hjá mér eða öðrum. Ég mun setjast niður með bæði Guðjóni (Þórðasyni þjálfara) og stjórn knattspyrnudeildarinnar í kvöld og fara varlega yfir alla fleti málsins."

Spurður hvort hann telji að hann eigi sjálfur sök á þessu, alla vega hluta sakarinnar, segir Stefán að það þurfi alltaf tvo til. „Það getur vel verið að ég sé svona hrikalega grófur. Ég hef bara spilað minn leik síðustu fimmtán ár og menn verða að taka því eða ekki. Ef svarið er ekki þá verð ég bara að hætta í fótbolta - því miður fyrir mig en ég veit að það er ánægjuefni fyrir aðra."

Guðjón Þórðarson sagði eftir leikinn við Keflavík að dómarar hefðu fundað um hvernig ætti að taka á ÍA og þá sérstaklega Stefáni Þórðarsyni. Hann sagði einnig að dómari leiksins hefði beitt Stefán ofbeldi með því að gefa honum rauða spjaldið.

Stefán vill þó ekki sjálfur segja að hann hafi verið lagður í einelti af dómurum. „Það eru ekki mín orð, alls ekki. En ef menn skoða hvað átti sér stað í leiknum á móti Fram þar sem leikmaður þeirra fékk gult spjald fyrir að taka mig hálstaki, rífa mig niður í grasið og halda mér þannig. Ég hef spurt hvað ég hefði fengið fyrir þetta og í flestum tilfellum er mér sagt að ég hefði fengið rautt. Það segir meira en mörg orð."

Áður en hann kom til ÍA í vetur lék hann með Norrköping í Svíþjóð við góðan orðstír. „Ég var með orð á mér fyrir að vera harður þar en menn höfðu engar stórkostlegar áhyggjur af því. Ég gat spilað fótbolta þar án mikilla vandkvæða. Þannig var það einnig á Íslandi þar til nú."

Hann útilokar þó að fara aftur til Norrköping. „Sá kafli í mínum huga er búinn og er ég ekki á þeim nótum í dag."

Stefán fer nú sjálfkrafa í tveggja leikja bann þar sem hann hefur fengið tvö rauð spjöld á tímabilinu. „Eftir Keflavíkurleikinn var ég dæmdur í eins leiks bann fyrir hluti sem ég gerði ekki. Ég get því aðeins ímyndað mér hvað ég fæ núna fyrst ég á að hafa brotið svona illa á mér. Það hlýtur að verða eitthvað mjög alvarlegt."

Alls voru níu rauð spjöld gefin í sjöttu umferðinni en til samanburðar má nefna að alls voru þau 20 allt síðasta tímabil.