Brown og Young bestir í september

Phil Brown hjá Hull City og Ashley Young hjá Aston Villa voru í dag kjörnir knattspyrnustjóri og leikmaður septembermánaðar í ensku úrvalsdeildinni.

Undir stjórn Brown hefur Hull sett á svið sannkallað öskubuskuævintýri á sínu fyrsta tímabili í efstu deild. Liðið byrjaði mánuðinn á 2-1 sigri á Newcastle og 2-2 jafntefli við Everton, en síðan fylgdu ótrúlegir sigrar á bæði Arsenal og Tottenham á útivelli.

Hull er sem stendur í þriðja sæti úrvalsdeildarinnar, en flestir sérfræðingar voru á því að liðið myndi falla rakleitt niður í b-deildina á ný í vor.

Vængmaðurinn Ashley Young hefur verið í fantaformi með liði sínu Aston Villa að undanförnu og var lykilmaður í þremur sigrum liðsins í röð.

Young vann þessi verðlaun í apríl í vor og með útnefningunni að þessu sinni er hann því kominn í sannkallaðan úrvalshóp leikmanna sem unnið hafa þessi verðlaun oftar en einu sinni. Það eru menn eins og Cristiano Ronaldo, Wayne Rooney og Steven Gerrard svo einhverjir séu nefndir.