Stjórn Landsvirkjunar einhuga um nafnleynd

Stjórn Landsvirkjunar telur að það kunni að draga úr umsóknum hæfra einstaklinga verði opinberað hverjir sækja um forstjórastöðu fyrirtækisins, að sögn Ingimundar Sigurpálssonar stjórnarformanns Landsvirkjunar.

,,Að fenginni reynslu þá vitum við að ýmsir öflugir stjórnendur eiga erfitt með að sækja um þegar upplýsingar eru gefnar upp um umsóknir. Ég heyrði engar mótbárur við því að þessi leið væri farin í stjórninni. Þetta er mjög almennt viðhorf," segir Ingimundur.

Staða forstjóra Landsvirkjunar var auglýst til umsóknar um helgina en Friðrik Sophusson hefur ákveðið að láta af störfum sem forstjóri fyrirtækisins. Sjálfur var Friðrik ráðinn án auglýsingar en hann tók við sem forstjóri 1. janúar 1999. Fram kom í auglýsingunni um helgina að farið verði með allar umsóknir sem trúnaðarmál. Umsækjendum um forstjórastöðu Orkuveitu Reykjavíkur var einnig heitið trúnaði og nafnleynd.

Í samtali við Vísi fyrr í vikunni gagnrýndi Álfheiður Ingadóttir, þingmaður Vinstri grænna, stjórnir fyrirtækjanna harðlega. Hún segir ámælisvert að umsækjendum um forstjórastöður opinbera fyrirtækja sé heitið nafnleynd.

Ingimundur segir að ráðningarferlið verði ekki gegnsærra með því að gert verði opinbert hverjir sækja um stöðuna. ,,Ákvörðun um ráðningu forstjóra byggir að stórum hluta á huglægu mati sem erfitt er að gera gegnsætt," segir Ingimundur og bætir við að ákvörðun stjórnarinnar stangist ekki á við lög um Landsvirkjun og lög um opinbera starfsmenn. Ingimundur á von á því að greint verði frá fjölda þeirra sem sækja um forstjórastöðuna.

Undanfarin misseri hafa ýmsir verið nefndir sem eftirmenn Friðriks sem forstjóri Landsvirkjunar. Spurður hvort að umræðan skaði að einhverju leyti fyrirtækið segir Ingimundur svo ekki vera. ,,Ég get ekki lagt mat á það hvort að umræða sé góð eða slæm. Ég hef ekki orðið sérstaklega var við að hún hafi komið fyrirtækinu illa hvort sem að öflugir sjálfstæðismenn hafi verið tengdir umræðu um stöðu forstjóra Landsvirkjunar eða einhverjir aðrir."

Aðspurður hvort að hann hafi viljað að Friðrik sæti áfram sem forstjóri Landsvirkjunar segist Ingimundur hafa viljað vinna með honum áfram. ,,Friðrik hefur að mínu mati staðið sig feykivel."