Byrgisstrákur segir Guðmund hafa sýnt sér dýflissuna

Ungur piltur sem dvaldi í Byrginu í eitt ár segir Guðmund Jónsson hafa sýnst sér dýflissuna sem hann var með í kjallaranum á heimili sínu í Hafnarfirði. Hann segist einnig hafa tekið þátt í kynlfísleikjum ásamt Guðmundi og annarri stúlku. Hann er fyrst núna hættur að verja gjörðir Guðmundar sem hann segist hata af öllu sínu hjarta. Guðmundur reyndi að samræma vitnisburð piltsins við söguna sína.

Pilturinn hringdi inn í útvarpsþáttinn Harmageddon á X-inu 977 á föstudaginn og sagði frá kynnum sínum af Guðmundi.

„Hann fær alla á sitt band og það eru allir með samsæri gegn honum. Hægt og rólega fer maður að verja hann," segir pilturinn sem var í Byrginu í eitt ár.

„Þessi maður kann svo að ljúga og sögurnar sem hann býr til eru rosalegar. Hann sagði mér til dæmis að hann væri að fara að eignast BDSM klúbb í Bretlandi og að hann væri Iron Master."

Pilturinn segir að fyrst þegar málið kom upp hafi hann farið að verja Guðmund en lögreglumaður sem fór með rannsókn málsins hafi hjálpað sér mikið. „Ég er bara nýbúinn að rífa mig upp og hættur að verja hann, ég hata þennan mann af öllu mínu hjarta."

Einnig kom fram í viðtalinu að fyrrverandi kærasta piltsins er ein af þeim stúlkum sem kærðu Guðmund og vann málið. Aðspurður um dýflissuna sem Guðmundur er sagður hafa verið með í kjallara heimilis síns í Hafnarfirði sagðist strákurinn hafa farið þar inn með Guðmundi.

„Þetta var eins og að labba inn í einhverja bíómynd. Það var gat á veggnum sem falið var með spýtu inn í skáp. Síðan færði hann spýtuna til og þá var maður kominn inn í einhverja Lísu í Undralandi."

Hann viðurkenndi í þættinum að hafa tekið þátt í kynlífsathöfn með Guðmundi og annarri stúlku.

Í dómnum yfir Guðmundi sem féll á föstudaginn í síðustu viku kemur fram að Guðmundur greiddi pilti 15.000 krónur fyrir að stunda kynlíf með annarri stúlku á meðan hann horfði á.

Hann sagðist hafa heyrt í Guðmundi daginn sem hann fór í skýrslutöku hjá lögreglunni. „Þá reyndi hann að samræma vitnisburð minn við þá sögu sem hann ætlaði að segja sjálfur. Hann reyndi að fiska upp úr mér það sem ég sagði við lögregluna."

Pilturinn sagði Guðmund hafa verið nokkuð öruggan með að vinna málið fyrir Hérðasdómi. „Hann sagði við mig áður en ég fór að bera vitni að þegar hann myndi vinna málið þá ætlaði hann að bjóða mér í grillveislu fyrir alla peningana sem hann fengi í skaðabætur."

Pilturinn sagði einnig frá því að Guðmundur hafi eitt sinn boðið sér eiturlyf.

„Ég hitti hann og þá dró hann upp amfetamínpoka og leyfði mér að smakka, þetta var á meðan ég var í neyslu."

Þriggja ára fangelsisdómurinn sem Guðmundur hlaut á föstudaginn er of vægur að mati piltsins sem hefur sjálfur íhugað að leggja fram kæru enda hafi hann verið undir lögaldri þegar á þessu stóð.

„Ég bara vildi ekki taka sjénsinn og láta nafnið mitt opinberast. Ég sætti mig bara við þetta, alveg þar til nú. Það hefur hinsvegar hvarflað að mér upp á síðkastið að leggja fram kæru."