Maradona tekur við Argentínu

Þær óvæntu fréttir bárust í kvöld að Diego Armando Maradona hefur verið ráðinn þjálfari argentínska landsliðsins. Maradona er lifandi goðsögn eftir að hafa leikið lykilhlutverk í sigri Argentínu á HM 1986.

Maradona er 48 ára en eftir að Alfio Basile sagði starfi sínu lausu fyrr í þessum mánuði lýsti hann yfir vilja til að taka við Argentínu. „Ég myndi sinna því starfi með mikilli ánægju - hver myndi ekki vilja gera það? Ég er allur af vilja gerður og forráðamönnum landsliðsins stendur til boða að fá mig til liðs við þá," sagði Maradona.

Maradona hefur nú fengið ósk sína uppfyllta og er orðinn landsliðsþjálfari Argentínu. Noray Nakis, forseti argentínska knattspyrnusambandsins, tilkynnti það í kvöld.