Segir hugmyndir Björns fjarlægan möguleika

Geir H. Haarde forsætisráðherra boðaði til blaðamannafundar í Stjórnarráðinu nú fyrir stundu. Tilefnið voru ummæli Björns Bjarnasonar dómsmálaráðherra um að taka ætti upp evru á grundvelli EES samningsins án þess að ganga inn í Evrópusambandið. Geir sagði þetta fjarlægan möguleika og taldi ráðamenn í Brussel hafa lítið álit á þessum hugmyndum.

Hann sagði hugmyndir Björns ekki marka neina stefnubreytingu hjá ríkisstjórninni og hvatti menn til þess að fara ekki út í þessa umræðu með einhverjum asa. Hann sagði málið lýsa fullkominni gúrkutíð hjá blaðamönnum þar sem mikið hefði verið fjallað um það.

Geir sagði að ef við ættum á annað borð að skipta um gjaldmiðil efaðist hann um að evran væri endilega það rétta. Sjálfur hefði hann þó ekki tekið afstöðu til þess. Ef við ætluðum að taka upp evru ættum við að fara inn um aðaldyrnar en ekki einhverjar bakdyr.

Forsætisráðherra sagði fólk sem væri alltaf að tala um að við ættum að ganga í Evrópusambandið vera að leita sér skjóls frá slæmu efnahagsástandi. Hann sagði slæmt ástand í dag vera vegna þess að við værum að jafna okkur eftir miklar stórframkvæmdir og þessi staða hefði verið fyrriséð en ofan á það hefði bæst erfiðar aðstæður utan úr heimi og nefndi þar lausafjárkreppu.

Geir sagðist telja að Evróputalið myndi jafna sig þegar kreppan myndi lægjast. Hann telur að þegar efnahagsástandið komist í jafnvægi sé krónan hentugust fyrir íslenska efnahagskerfið.