Ræði við Eið Smára þegar nær dregur

Ólafur Jóhannesson landsliðsþjálfari segir ekki tímabært að segja til um hvort Eiður Smári Guðjohnsen taki þátt í æfingaleiknum gegn Möltu í næsta mánuði.

Í samtali við Morgunblaðið í dag sagðist Eiður Smári ekki sjá fram á að gefa kost á sér í leikinn við Möltu, en hann er nú um það bil að ná sér af meiðslum sem hann varð fyrir í landsleik Íslands og Makedóníu um miðjan mánuð.

Íslenska karlalandsliðið í knattspyrnu mætir Möltu í vináttulandsleik ytra þann 19. nóvember næstkomandi.

Vísir spurði Ólaf Jóhannesson landsliðsþjálfara út í orð Eiðs Smára og spurði hvort útséð væri með að Eiður tæki þátt í leiknum.

"Ég er búinn að ræða við hluta af mínum leikmönnum um Möltuleikinn en það hefur engin ákvörðun verið tekin um það hverjir taka þátt í honum og hverjir ekki, enda er ég ekki búinn að velja hópinn. Ég vil auðvitað fá mitt sterkasta lið í alla leiki en það er margt sem þarf að taka með í reikninginn eins og meiðsli og leikjaálag," sagði Ólafur í samtali við Vísi.

En hvað finnst Ólafi um orð Eiðs Smára í Morgunblaðinu þar sem hann segist ekki sjá fram á að gefa kost á sér í næsta æfingalandsleik?

"Ég hef svo sem ekkert um það að segja. Ég hef ekki rætt við hann um það. Æfingaleikir eru auðvitað æfingaleikir - en þeir eru nauðsynlegir engu að síður. Ég hef svo sem ekkert um þessa yfirlýsingu að segja, hann hefur ekki sagt mér þetta," sagði Ólafur.

"Maður þarf auðvitað að taka tillit til manna sem hafa kannski verið meiddir eða ekki fengið að spila marga leiki og ég kem til með að gera það. Eiður Smári er auðvitað búinn að vera meiddur og því er kannski erfitt fyrir hann að segja til um hvort hann verði í standi til að spila eftir þrjár vikur. Ég tek á því og ræði við hann þegar að því kemur," sagði Ólafur.

Ísland og Malta mættust síðast á æfingamóti á Möltu í febrúar á þessu ári, en þar höfðu heimamenn betur 1-0.