Ferry biðst afsökunar

Söngvarinn Bryan Ferry hefur beðist afsökunar á jákvæðum ummælum sínum um nasista. Ferry sagði í viðtali að valdatími nasista væri „hreint frábær“.

Brian Ferry, sem er fyrrum söngvari Roxy Music, lét ummælin falla í viðtali við þýskt dagblað. Þar talaði hann um aðdáun sína á verkum Leni Riefenstahl sem gerði áróðursmyndir fyrir nasista, og arkitektúr Albert Speer. Í viðtalinu, sem birtist í Welt am Sonntag, viðurkenndi Ferry einnig að hann kallaði hljóðver sitt í London „Führerbunker“.

„Ég biðst innilega afsökunar ef ummæli mín hafa móðgað einhvern. Þau voru eingöngu hugsuð út frá listrænu og sögulegu sjónarhorni. Eins og öðrum finnst mér nasistatíminn hræðilegur.“