Fjórir láta lífið af völdum fellibylsins Felix

Að minnsta kosti fjórir létu lífið þegar fellibylurinn Felix skall á austurströnd Níkaragva í Mið-Ameríku í kvöld. Bylurinn olli miklu tjóni þegar hann gekk yfir borgina Puerto Cabezas í norðurhluta Níkaragva. Rafmagns- og símalínur eyðilögðust og þúsundir þurftu að flýja heimili sín.

Tré rifnuðu upp með rótum og tókust á loft og þök fuku af húsum. Nú þegar hafa fjórir látið lífið í strandhéruðum Níkaragva vegna bylsins þar á meðal ung stúlka. Óttast er að aurskriður fylgi í kjölfarið enda hefur mikil úrkoma verið á svæðinu.