Fótboltabullan fékk skilorðsbundinn dóm

Frægasta fótboltabulla Norðurlanda, sem ákærð var fyrir að hlaupa inn á völlinn í leik Dana og Svía á Parken í júní síðastliðnum, var í dag dæmd í eins mánaðar skilorðsbundið fangelsi í bæjarrétti í Kaupmannahöfn. Auk þess var hinn 29 ára gamli Dani dæmdur til að sinna 40 klukkustundum í samfélagsvinnu og borga sakarkostnað.

Maðurinn komst í heimsfréttirnar fyrr í sumar í sögulegum leik Dana og Svía á Parken. Þá hljóp hann inn á völlinn og reyndi að kýla dómarann, Herbert Fandel, eftir að hann hafði dæmt vítaspyrnu á Dani vegna þess að einn úr danska liðinu hafði kýlt mótherja sinn niður í markteignum. Knattspyrnusamband Evrópu úrskurðaði Svíum 3-0 sigur í leiknum og setti danska knattspyrnusambandið í heimaleikjabann ásamt því að sekta það.

Maðurinn var sakfelldur fyrir að hafa hlaupið í leyfisleysi inn á völlinn en hann hafði viðurkennt það brot. Þá var hann dæmdur fyrir að reyna að slá til dómarans. Dómarinn sagði við réttarhöldin í dag að venjulega væru menn dæmdir í óskilorðsbundið fangelsi fyrir árásir sem þessa en að undantekning yrði gerð í þessu tilviki af því að málið hefði haft mjög alvarlegar afleiðingar fyrir bulluna sem nú þyrfti að vera í felum.

Lögmaður mannsins, sem býr í Svíþjóð, sagðist ekki hafa ákveðið hvort málinu yrði áfrýjað til æðra dómstigs.

Forsvarsmenn Parken og Danska knattspyrnusambandsins gerðu samtals kröfur upp á um það bil 100 milljónir króna í bætur á hendur manninum vegna tekjutaps. Þeim kröfum var vísað frá vegna skorts á sönnunargögnum.