Þriðja stóra hryðjuverkamálið í Danmörku á tæpum tveimur árum

Átta menn voru handteknir í Kaupmannahöfn í nótt - grunaðir um að hafa ætlað að smíða sprengjur sem nota átti til hryðjuverkaárása í Danmörku. Mennirnir eru sagðir tengjast al Kaída. Þetta er þriðja stóra hryðjuverkamálið í Danmörku á tæpum tveimur árum.

Mennirnir eru allir af erlendu bergi brotnir en sex þeirra danskir ríkisborgarar. Þeir eru á aldrinum nítján til tuttugu og átta ára. Krafist verður gæsluvarðhalds yfir minnst tveimur þeirra. Lögregla réðst til inngöngu á ellfu stöðum í Kaupmannahöfn þar á meðal í Ishøj, Avedøre og Glasvej í norð-vesturhluta Kaupmannahafnar.

Vel á fjórða tug lögreglumanna tóku þátt í aðgerðunum. Grunur lék á að mennirnir væru að smíða sprengjur og því voru sprengjusérfræðingar kallaðir til. Þeir klæddust hlífðarfatnaði af ótta við það sem inn í íbúðunum væri að finna.

Á blaðamannfundi í morgun sagði talsmaður dönsku leyniþjónustunnar, PET, að fylgst hefði verið með mönnunum um nokkurt skeið og þeir síðan handteknir á grundvelli hryðjuverkalaga. Þeir hafi verið grunaðir um að ætla að smíða sprengjur enda hefðu þeir sankað að sér efni til þess.Hald hafi verið lagt á ýmis efni - þar á meðal óstöðugt efni eins og það var orðað. Ekki virðist vitað hvar þeir hafi ætlað að láta til skarar skríða. Lögregla segir mennina tengjast al Kaída hryðjuverkasamtökunum.

Þetta er þriðja stóra hryðjuverkamálið í Danmörku sem danska lögreglan segir merkilegt í ekki stærra landi. Fjórir menn voru handteknir í október 2005 í Glostrup og voru þeir sagðir tengjast tveimur mönnum sem höfðu hlotið dóm fyrir hryðjuverk í Bosníu. Aðeins einn fjórmenningana hlaut dóm. Sjö menn voru svo handteknir í Vollsmose í Óðinsvéum í september í fyrra grunaðir um að skipuleggja sprengjuárásir í Danmörku. Málið gegn þeim verður tekið fyrir á næstu dögum.