Kramer neitaði að mæta fyrir gervirétti

Góðvinur Jerrys Seinfeld, Kosmo Kramer, neitaði að mæta við gerviréttarhöld með fjórum blökkumönnum sem hann móðgaði í uppistandi á skemmtistað í Hollywood. Leikarinn Michael Richards missti stjórn á skapi sínu þegar honum fannst fólkið, þrír karlmenn og ein kona, trufla uppistand sitt. Hann jós úr skálum reiði sinnar yfir það og notaði meðal annars n-orðið illræmda.

Richards hefur síðan margbeðist afsökunar og boðist til að hitta fólkið augliti til auglitis, til þess að biðja það persónulega afsökunar. Lögfræðingar aðila hafa hinsvegar ekki náð samkomulagi um framkvæmd þess fundar. Lögfræðingur hinna fjögurra ákvað því að efna til gerviréttarhalda, með þáttöku þeirra, um helgina. Richards var boðið að taka þátt, en hafnaði því. Réttarhöldin munu fara fram engu að síður.