Flaug með fimm kjarnorkusprengjur fyrir mistök

Bandarísk herflugvél flaug fyrir mistök með fimm kjarnorkusprengjur um borð yfir Bandaríkin í síðustu viku. Mistökin uppgötvuðust fyrir tilviljun en yfirmenn flughersins segja að þrátt fyrir þau hafi aldrei verið nein hætta á ferðum.

Sprengjuflugvélin, sem er af gerðinni B-52, tók á loft frá herstöð í Norður-Dakóta fylki og flaug til Louisiana fylkis í suðurhluta Bandaríkjanna. Fyrir mistök voru um borð í vélinni fimm kjarnorkusprengjur.

Málið þykir hið vandræðalegasta fyrir flugher Bandaríkjamanna en yfirmenn hans segja að engin hætta hafi verið á ferðum. Benda þeir á að vopnin hafi verið þannig úr garði gerð að þau gátu ekki sprungið fyrir mistök.

Opinber rannsókn á málinu er hafin en allt bendir til þess að um einangruð mistök hafi verið að ræða.