Flytja allt plútóníum á einn stað

Bandarísk stjórnvöld hafa ákveðið að flytja allar birgðir af geislavirku plútóníum sem nota má í kjarnorkuvopn til Savannah River í Suður-Karólínu fylki. Er þetta gert til að einfalda öryggisgæslu og kostnað og koma í veg fyrir hryðjuverkaárásir. Alls verða um þrjú þúsund gámar af plútóníum fluttir á hið nýja öryggissvæðið.

Plútóníumið kemur annars vegar frá geymslustöðvum í nágrenni Washingtonborgar og hins vegar frá rannsóknarstofum í Los Alamos í Nýju-Mexíkó og Livermore í Kaliforníu. Ákvörðunin um að flytja allar birgðir af plútóníum á einn stað var tekin skömmu eftir árásirnar á tvíburaturnana í New York árið 2001.

Á blaðamannfundi í dag sagði James Rispoli, aðstoðarorkumálaráðherra Bandaríkjanna, að með því að setja allar birgðir af geislavirku plútóníum á einn stað væri hægt að einfalda öryggisgæslu og draga úr kostnaði vegna hennar. Hann vildi þó ekki gefa upp um hversu mikið magn af plútóníum væri að ræða.