Stjórnarþingmenn ósammála um Hafró

Ágreiningur er innan stjórnarliðsins um Hafrannsóknarstofnun. Össur Skarphéðinsson, iðnaðaráðherra, vill færa stofnunina undan sjávarútvegsráðuneyti en Arnbjörg Sveinsdóttir, formaður þingflokks Sjálfstæðisflokks er algerlega ósammála. Samflokksmaður hennar, Einar Oddur Kristjánsson er svipaðra skoðana og Össur og segir Hafró hafa beitt fasískum vinnubrögðum.

Iðnaðarráðherra kveður nokkuð fast að orði á bloggsíðu sínni þar sem hann lýsir því yfir að hann telji Hafró betur borgið undir öðru ráðuneyti en sjávarútvegs. Hann talar um hættuna á pólitískri stýringu á vísindunum og skort á óháðri akademískri rannsóknarstofnun. Stjórnmálamenn hafa búið til sovéskt kerfi í kringum Hafró - segir hann - þar sem dæmalausri þöggun hafi verið beitt á andófsraddir.

Einar Oddur Kristjánsson, alþingismaður fagnar þessu útspili ráðherrans enda segist hann hafa talað fyrir aðskilnaði veiðiráðgjafarinnar og ákvörðun aflamarks. Hann segir að hafró hafi beitt fasískum vinnubrögðum þar sem engin hafi mátt vera ósammála stofnuninni. Einar Oddur hefur sjálfur talað fyrir því að fela háskólunum það rannsóknarhlutverk sem Hafró hafi í dag. Hann hefur verið gagnrýnin á kvótakerfið og uppskorið bágt fyrir frá Árna Mathiesen, fjármálaráðherra sem hefur sakað þennan flokksbróður sinn um að bera sinn hluta af því að skaða kvótakerfið. Einar Oddur segir að það þurfi að ræða þessi mál af yfirvegun og fjármálaráðherra hafi með ummælum í sinn garð gengið af göflunum.

Arnbjörg Sveinsdóttir, formaður sjávarútvegsnefndar og formaður þingflokks sjálfstæðisflokksins er ekki sammála Össuri um að flytja stofnunina og segir að sér komi á óvart að ráðherrann skuli viðra þessa skoðun á bloggsíðu sinni. Þetta mál hafi ekki verið rætt í sjávarúvegsnefnd - en Arnbjörg telur Hafró ágætlega komna undir sjávarútvegsráðuneyti.

Jóhann Sigurjónsson, forstjóri Hafró segir að það sé ekki stofnunarinnar að hafa skoðun á því hvar hún sé vistuð. Það sé þó vont ef sú umræða verði einhvers konar innlegg í umræðu um áreiðanleika niðurstöðu Hafró um stöðu fiskistofnanna. Hann segir alrangt að stofnunin hafi verið beitt pólitískum þrýstingi og þar sé ekki tekin afstaða til einkahagsmuna.