Smith öskuillur vegna ummæla um Hitler

Hollywoodleikarinn Will Smith neitar ásökunum fjölmargra vefsíðna um að hann telji að Hitler hafi verið "góð" manneskja. Hann segir ummæli sem höfð voru eftir honum í skoska dagblaðinu Daily Record hafa verið mistúlkuð og tekin úr samhengi.

Í blaðinu var haft eftir Smith: "Jafnvel Hitler vaknaði ekki á morgnana og hugsaði hvað væri það versta sem hann gæti gert í dag."

"Ég held að hann hafi vaknað á morgnana og með brengluðum huga og öfugri rökhugsun ætlað að gera það sem hann hélt að væri "gott"."

Blaðamaðurinn bætti við eigin athugasemd í greininni, "Will telur að allir séu í raun góðir."

Frá birtingu greinarinnar um síðustu helgi hafa tugir slúðursíðna um fræga fólkið birt fréttir um umælin. Margar segja að Smith telji að Hitler hafi verið góð manneskja.

"Það er hræðileg og ógeðsleg lygi," sagði Smith í yfirlýsingu.

"Hún sýnir hversu hættulegt vald fáfróðrar manneskju vopnaðri penna getur verið. Ég er bálreiður að þurfa að svara svo fáránlegum mistúlkunum."

"Adolf Hitler var andstyggilegur, viðbjóðslegur morðingi sem var ábyrgur fyrir mesta hrottaskap gegn mannkyninu á þessari jörðu," sagði einnig í yfirlýsingu leikarans.