Stuðningsmenn Liverpool styðja Benitez

Stuðningsmenn Liverpool munu í kvöld marsera til stuðnings Rafa Benitez knattspyrnustjóra fyrir leik liðsins gegn Porto í A-riðli Meistaradeildarinnar í kvöld.

Liverpool berst fyrir lífi sínu í riðlakeppninni og þarf nauðsynlega á sigri að halda. Benitez knattspyrnustjóri hefur verið mikið í umræðunni undanfarna daga vegna deilna sinna við eigendur félagsins vegna fyrirhugaðra leikmannakaupa í janúarglugganum.

Liverpool verður að leggja bæði Porto og Marseille að velli í síðustu tveimur leikjum sínum til að vinna sér sæti í 16-liða úrslitunum og ætla stuðningsmenn Liverpool að syngja nafn Benitez af og til í allt kvöld.

Sjónvarpsstöðin Sýn verður með beinar útsendingar frá leikjum kvöldsins í Meistaradeildinni og verður leikur Liverpool og Porto sýndur beint á Sýn, Rosenborg-Chelsea er í beinni á Sýn Extra og Bremen-Real Madrid er í beinni á Sýn Extra. Bein útsending frá leikjunum hefst klukkan 19:30 og eftir leikina verður farið yfir gang mála í öllum leikjum kvöldsins á Sýn.