Síðasta vígið fallið?

Íslendingar hafa undanfarin ár verið duglegir að fjárfesta í þjóðarperlum dana á borð við Illum og Magasin de Nord, við mismikla hrifningu innfæddra. Nú hlýtur þó síðasta vígið að vera fallið, en íslenskt fyrirtæki mun fyrir jól selja jólaskraut á jólamarkaði Tívolís.

Hjónin Bragi Baldursson and Guðrún Lísa Erlendsdóttir reka fyrirtækið Hjartans List, sem hefur framleitt handgert jólaskraut úr tré í næstum þrjátíu ár.

Þau fengu þá hugmynd í fyrra að selja vörur sínar í Tívolí. Að sögn Braga gekk það brösuglega til að byrja með, enda svari danskurinn tölvupóstum seint. Þeim var þó veitt viðtal fyrir rest. Þegar starfsmaðurinn var sannfærður um að það væri ekkert ,,Group"´ á bak við fyrirtækið og að hjónin hefðu engin áform um að yfirtaka tívolí blíðkaðist hún eitthvað og kíkti á vörurnar. Hennni leist vel á, og svo fór að hjónin voru ein þeirra sem voru valin til að selja vörur sínar í sölubásum á jólamarkaði tívolísins.

Hjónin verða með bás í Den Nordiske by, þar sem skandinavískt handverk verður í fyrirrúmi. Þau framleiða munina alla frá grunni, Bragi sker út úr trénu og Guðrún skreytir. Bragi segir að oft hafi þeim verið bent á að einfaldara væri að láta framleiða hlutina í Kína, og fullvinna þá svo hér heima. Það líst honum ekki á, enda vill hann hafa munina handunna á Íslandi. ,,Þetta snýst ekki um magn, heldur gæði. Þetta heitir Hjartans list af því þetta er unnið af hjartans list, ef svo væri ekki myndi ég hætta þessu." sagði Bragi.