Rijkaard lítur á björtu hliðarnar

Eiður Smári Guðjohnsen átti góðan leik fyrir Barcelona í kvöld þegar liðið gerði markalaust jafntefli gegn Glasgow Rangers á útivelli. Hann var mikið í boltanum og barðist vel fyrir liðið. Hann lék allan leikinn.

Börsungar voru þó talsvert frá sínu besta í kvöld. Þjálfarinn Frank Rijkaard vill þó ekki gagnrýna liðið of mikið og lítur á björtu hliðarnar.

„Jafntefli á útivelli í Meistaradeildinni eru ekki slæm úrslit. Það er samt svekkjandi að við höfum ekki náð að skora. Rangers var mjög skipulagt og varðist aftarlega," sagði Rijkaard.

Barcelona og Rangers eru efst í riðlinum, með sjö stig hvort lið. Lyon er með þrjú stig en Stuttgart rekur lestina stigalaust.