Hundruð milljóna í tekjur af Airwaves

Miðbær Reykjavíkur iðaði af lífi alla helgina þegar hátt í fimm þúsund manns lögðu leið sína á tónlistarhátíðina Iceland Airwaves. Um tvö þúsund hátíðargestir komu erlendis frá en talið er að hátíðin skili nokkur hundruð milljónum af sér í tekjur til hinna ýmsu þjónustuaðila í borginni.

Iceland Airwaves tónlistarhátíðin var nú haldin í níunda sinn  og þótti hún í alla staði fara vel fram. Lögreglan þurfti lítil afskipti að hafa af tónleikagestum en nokkuð bar á því að gestir reyndu að komast inn með fölsuð inngangsarmbönd. Eldar Ástþórsson, framkvæmdastjóri hátíðarinnar, sagði í samtali við fréttastofu að meira hefði verið um slík mál en fyrri ár og verða yfir þrjátíu einstaklingar kærðir fyrir að falsa armbönd.

Tónlistarhátíðin setti skemmtilegan svip á miðbæ Reykjavíkur um helgina. Fyrir þá sem ekki áttu miða á hátíðina var ýmislegt í boði en talið er að hátt í átta þúsund manns hafi mætt á uppákomur tengdar Iceland Airwaves.

Hátt í tvö þúsund erlendir gestir komu hingað til lands á hátíðina og voru hótel víða full í miðbænum. Könnun sem gerð var fyrir tveimur árum sýndi að hátíðin skilar nokkur hundruð milljónum króna í tekjur til hinna ýmsu aðila í borginni svo sem veitingastaða.

Það er fyrirtækið Hr. Örlygur sem skipuleggur hátíðina og hefur síðustu ár fengið til þess styrk frá Reykjavíkurborg og Icelandair. Eldar segir opinberan stuðning við hátíðina lítinn og hefur fyrirtækið óskað eftir því að ferðaþjónustuaðilar og ráðuneyti komu í auknu mæli að hátíðinni.

Fjöldi erlendra blaðamanna komu hingað til lands í tengslum við hátíðina og starfsfólk erlendra útgáfufyrirtækja. Þegar hefur ein íslensk hljómsveit sem spilaði á hátíðinni fengið útgáfusamning við erlendan aðila.