Bóksalinn í Kabúl höfðar mál gegn Seierstad

Bóksalinn í Kabúl hafnaði í dag tilboði norsku blaðakonunnar og rithöfundarins Åsne Seierstad um fimm milljóna króna greiðslu vegna bókarinnar sem hún skrifaði með hann sem fyrirmynd. Shah Mohammed Rais var bóksali í Kabúl sem Seierstad bjó lengi hjá meðan hún var í Afganistan.

Shah Mohammed segir að bókin hafi lagt líf sitt í rúst og sundrað fjölskyldu sinni. Hann hefur lengi krafist bóta síðan bókin kom út árið 2002. Útgefandi Seierstad og hún sjálf ætluðu í sameiningu að greiða þessar fimm milljónir króna sem áttu að renna í sjóð til að styrkja Afganskar bókmenntir. Jafnframt var því lýst yfir að þetta væri endanlegt tilboð.

Shah Mohammed ætlar nú að höfða mál gegn Seierstad fyrir brot á friðhelgi einkalífs síns. Útgefandinn segir að jafnvel þótt þau þau tapi málinu verði skaðabæturnar hvergi nærri fimm milljónum króna.