Ólafur Páll vill fara frá FH

Ólafur Páll Snorrason vill losna undir samningi sínum við bikarmeistara FH og leika með öðru liði í Landsbankadeildinni á næsta ári.

Í viðtali við DV í dag segist hann hafa rætt við FH-inga um að fá sig lausan og að þeir hafi tekið vel í það.

„Ég var ekkert inn í myndinni síðasta árið og var orðinn mjög pirraður. FH-ingar skilja það mjög vel að ég vilji fara,“ sagði Ólafur Páll.

Hann kom við sögu í aðeins tveimur leikjum með FH í deildinni sumar en fyrri hluta tímabilsins var hann í láni hjá Fjölni. Þar spilaði hann sex leiki í 1. deildinni.

Ólafur Páll spilaði stórt hlutverk hjá FH síðustu tvö ár en fékk færri tækifæri eftir að Matthías Guðmundsson gekk til liðs við félagið. Þar áður lék hann með Fylki árin 2003 og 2004 og Stjörnunni þar áður.