Grétar semur við KR til fjögurra ára

Grétar Sigfinnur Sigurðarson staðfesti í dag við Vísi að hann mun ganga til liðs við sitt gamla félag, KR.

Grétar er uppalinn KR-ingur en hefur undanfarin ár leikið með Víkingi og Val. Hann hefur þótt einn besti varnarmaður deildarinnar og mun reynast liði KR veruleg búbót.

„Ég get staðfest þetta," sagði Grétar við Vísi. „Það verður skrifað undir samninginn væntanlega í dag eða á morgun."

Samningur hans mun ná til næstu fjögurra ára.

„Ég er kominn heim og tilfinningin er betri en ég get lýst. Þetta er mikill léttir. Þetta hefur verið reynt áður en gekk ekki þá en nú gekk allt upp. KR var alltaf minn fyrsti kostur þó ég skoðaði alla möguleika."

Grétar segir að valið hafi staðið fyrst og fremst á milli Vals og KR. „Þetta var erfið ákvörðun. Það er margt gott í val og það hefði sjálfsagt verið öruggari kostur fyrir mig. Þjálfarinn er einn sá besti á landinu og ég veit að ég og Atli náum vel saman. En ég ákvað að taka slaginn með KR enda er ég KR-ingur."