Talið að sjö börn hafi gist hjá Madeleine

Portúgalska lögreglan telur að Madeleine og tvíburasystkyni hennar hafi ekki verið ein í íbúð McCann hjónanna í Praia da Luz kvöldið sem stúlkunni var rænt. Portúgalska blaðið 24 Horas heldur því fram að lögreglan telji að börn sjö vina þeirra hafi einnig verið í íbúðinni 3. maí síðastliðinn.

Paulo Rebelo rannsóknarlögreglumaður sem þekktur er fyrir að uppræta stærsta barnaklámhring í Portúgal hefur tekið við rannsókn hvarfsins á Madeleine. Hann er nú kominn til Praia da Luz og fyrirskipaði í gær fimm klukkustunda rannsókn á íbúðinni sem fjölskyldan gisti í.

McCann hjónin hafa haldið því fram að Madeleine hafi verið ein í íbúðinni ásamt tvíburunum á meðan þau borðuðu kvöldverð með vinum sínum á tapas veitingastað skammt frá.

Vinahópurinn segir að önnur börn hafi verið í sínum íbúðum og litið hafi verið eftir þeim reglulega um kvöldið.

Heimildarmaður úr rannsóknarliðinu sagði blaðinu að það væru ekki bara sönnunargögn sem bentu til þess að fleiri börn hafi verið í íbúðinni um kvöldið. Við yfirheyrslur á vinunum sem snæddu saman um kvöldið kom í ljós að aðeins íbúð McCann hjónanna var heimsótt á meðan kvöldverðinum stóð.

Börnin höfðu heimsótt íbúðir hinna reglulega þá sex daga sem þau höfðu verið á hótelinu. Blaðið útskýrði ekki hvernig sýni úr þeim heimsóknum gætu tengst kvöldinu örlagaríka.

Þá dregur blaðið í efa vitnisburð karlmanns úr vinahópnum sem fór af veitingastaðnum klukkan 21:35 og kom til baka klukkan 22, örfáum mínútum áður en Kate McCann uppgötvaði hvarf dóttur sinnar.

Russel O´Brien neitaði að tengjast hvarfi Madeleine og sagðist hafa verið að sinna veikri dóttur sinni. O´Brien hefur ekki verið grunaður í málinu. Hann segir að dóttir hans hafi kastað upp og hann hafi beðið um að skipt yrði á sængurverum. Blaðið segir að starfsfólk Ocean Club hótelsins kannist ekki við að beðið hafi verið um slíkt umrætt kvöld.