Cisse vill þagga niður í Anfield

Framherjinn Djibril Cisse hjá Marseille segist enn elska stuðningsmenn Liverpool en ætlar sér að þagga niður í þeim þegar hann mætir þangað með franska liðinu í kvöld.

Cisse lék með Liverpool í nokkur ár og vann m.a. Meistaradeildina með liðinu á sínum tíma. Nú leikur hann með Marseille sem sækir Liverpool heim á Anfield í kvöld.

"Ég vildi alltaf halda áfram hjá Liverpool en maður fær ekki alltaf allt sem maður vill í fótboltanum," sagði Cisse, sem hefur verið gríðarlega óheppinn með meiðsli síðustu ár.

"Ég átti svo góðar stundir með Liverpool og sigurinn í Istanbul stendur þar auðvitað hæst. Ég tengist Liverpool alltaf sérstökum böndum og mér þykir vænt um stuðningsmenn félagsins - en ég vil skora fyrir Marseille á Anfield. Ég hugsa alltaf um það að skora mörk sama hvar ég spila. Það verður gaman að koma aftur á Anfield og spila þar í Meistaradeildinni, því Evrópukvöldin þar eru alltaf mjög sérstök," sagði Cisse.