Leifur og Jón semja við Fylki til fimm ára

Leifur Garðarsson, þjálfari Fylkis og Jón Sveinsson, aðstoðarmaður hans, hafa samið við Fylki til næstu fimm ára.

Þetta staðfesti Hörður Antonsson, formaður meistaraflokksráðs Fylkis, í samtali við Vísi.

„Við erum að byggja upp meiri stöðugleika hjá félaginu,“ sagði Hörður. „Við höfum líka verið að semja við leikmenn til fimm ára og nú þegar hefur einn efnilegasti leikmaður liðsins, Andrés Már Jóhannsson, skrifað undir slíkan samning.“

„Það er ekki að það hefur vantað stöðugleika í Fylkisliðið neitt sérstaklega, heldur frekar í íslenskan bolta yfirleitt,“ sagði Hörður.

Fylkir náði fjórða sæti Landsbankadeildar karla í sumar og komst í undanúrslit bikarkeppninnar.