Kristján áfram með Keflavík

Allt bendir til þess að litlar breytingar verði á þjálfaramálum liða Landsbankadeildarinnar. Þetta kom fram í fréttum Stöðvar 2 í kvöld. Kristján Guðmundsson verður áfram með Keflavík og þá vill KR halda Loga Ólafssyni.

Rúnar Arnarsson, formaður knattspyrnudeildar, segir að viðræður við Kristján séu langt á veg komnar og líklega verði gengið frá lausum endum í þessari viku. Keflvíkingar ollu vonbrigðum í sumar en þó er ánægja með störf Kristjáns.

Hjá Val, ÍA, Fylki, Breiðablik, Fram og HK verða engar þjálfarabreytingar og þrátt fyrir að Íslandsmeistaratitillinn hafi runnið FH úr greipum er reiknað með að Ólafur Jóhannesson verði áfram þjálfari liðsins. Þá verða nýliðarnir áfram með sömu þjálfara.

Flest bendir til þess að Logi Ólafsson verði áfram með KR. Samkvæmt heimildum íþróttadeildar Stöðvar 2 er mikill vilji fyrir því innan KR að halda Loga.