Goody viðurkennir að hafa verið háð megrunarpillum

Breska Big Brother stjarnan Jade Goody viðurkennir að hafa um langt skeið verið háð megrunarpillum en hún hefur lengi átt í baráttu við aukakílóin.

Goody missti tugi kílóa eftir að hún varð fræg fyrir þátttöku sína í Big Brother árið 2002 en hefur eftir það ýmist blásið út eða skroppið saman. Hún kom síðast fram í Celebrity Big Brother á þessu ári. Í viðtali við ITV sjónvarpsstöðina segist hin tveggja barna einstæða móðir hafa skemmt líkama sinn á neyslunni en pillurnar innihalda meðal annars amfetamín.

Jade hefur átt erfitt ár en hún missti nýlega fóstur og hætti með kærastanum Jack Tweed. Eftir það missti hún aftur stjórn á þyngdinni.

Í viðtalinu sem sýnt verður í næsta mánuði ræðir Goody opinskátt um þyngd sína en heldur því staðfastlega fram að hún láti nú lyfin eiga sig.