Ferguson: Mikilvægt að byrja á sigri

Sir Alex Ferguson var að vonum ánægður með sigur sinna manna á Sporting í Lissabon í kvöld. Hann var ánægður með frammistöðu Wayne Rooney sem sneri aftur úr meiðslum og á von á að hann verði klár á ný gegn Chelsea á sunnudaginn.

"Það setur tóninn að vinna fyrsta útileikinn í riðlakeppninni. Við reyndum að ráðast meira á þá í seinni hálfleiknum og það tókst. Þeir fengu að vísu nokkur færi en þeir náðu aldrei að opna vörnina okkar að neinu viti," sagði Ferguson. Hann var ánægður með frammistöðu Wayne Rooney sem spilaði sinn fyrsta leik í langan tíma.

"Það var erfitt að ákveða hvað ég ætti að halda honum lengi inni á vellinum en eftir að við skoruðum var auðveldara að taka hann af velli. Ég er viss um að hann verður klár gegn Chelsea á sunnudaginn."