Leigubílstjórar í New York leggja niður vinnu

Um 13 þúsund leigubílstjórar í New York borg í Bandaríkjunum héldu sig heima í dag til að mótmæla nýju tölvukerfi sem borgaryfirvöld vilja setja í leigubíla. Ekki urðu miklar truflanir á samgöngum en nú stendur yfir tískuvika þar í borg. Leigubílstjórarnir telja að tölvukerfið muni brjóta á mannréttindum þeirra og auka óþægindi í akstri.

Hinu nýja tölvukerfi er ætlað að auka öryggi og þægindi fyrir farþega. Sérstakur snertiskjár verður staðsettur í farþegarými bílsins og þar verður meðal annars hægt að ganga frá greiðslu fyrir farið sem og horfa á sjónvarp. Ennfremur verður kerfið tengt GPS staðsetningarkerfi sem gerir farþegum kleift að fylgjast með hvar þeir eru staddir í borginni hverju sinni.

Leigubílstjórar telja einboðið að yfirvöld muni nota kerfið til að njósna um ferðir leigubíla. Þá segja þeir að kerfið auki óþægindi í akstri þar sem frá því stafi mikill hiti. Áframhaldandi verkfall hefur verið boðað á morgun.