Höfðu mikið magn efna til sprengjugerðar undir höndum

Ríkissaksóknari Þýskalands, Monika Harms, sagði í morgun að mennirnir þrír sem voru handteknir í gær grunaðir um að skipuleggja hryðjuverk hefðu hlotið þjálfun í Pakistan. Harms sagði á blaðamannafundi um málið að mennirnir hefðu haft undir höndum 680 kíló af vetnisperoxíði til sprengjugerðar.

Blandað öðrum efnum hefði vetnisperoxíðið dugað í sprengju með sama kraft og 540 kíló af TNT sprengiefni. Það er mun öflugra en sprengjurnar sem sprungu í neðanjarðarlestarkerfum í London og Madríd.

Mennirnir eru grunaðir um að hafa ætlað að skipuleggja hryðjuverkaárásir á flugvöllinn í Frankfurt og á herstöð bandaríkjahers í Ramstein.

Flugvöllurinn í Frankfurt er einn sá fjölfarnasti í heimi. Herstöðin í Ramstein er í um 130 kílómetra fjarlægð frá vellinum, og er ein mikilvægasta herstöð Bandaríkjamanna utan heimalandsins.

,,Það eru sterkar vísbendingar til þess að Ramstein og Frankfurt-flugvöllur að minnsta kosti hafi verið möguleg skotmörk, og að stutt hafi verið í að mennirnir myndu láta til skarar skríða." sagði stjórnmálamaðurinn Wolfgang Bosbach við þýska sjónvarpsstöð. Hann bætti við að líklegt væri að árásin hefði verið áætluð 11. september, á afmæli árásarinnar á tvíburaturnana.

Fyrr á þessu ári var líbanskur maður kærður fyrir tilraun til sprengjuárásar í Þýskalandi árið 2006. Hann og vitorðsmaður hans skildu tímastilltar sprengjur eftir í tveimur lestum, en þær sprungu aldrei vegna bilunar í tæknibúnaði.

Þýskir hermenn eru meðal herliðs NATO í Afghanistan. Þýsk yfirvöld hafa lengi óttast að öfgahópar sæki í sig veðrið í landinu, en í Hamburg var ein af bækistöðvum hryðjuverkamannanna sem réðust á tvíburaturnana í new york þann 11. september 2001.