Óttast um afdrif Steve Fossett

Leit stendur nú yfir að bandaríska auðkýfingnum og ævintýramanninum Steve Fosset en ekkert hefur til hans spurst síðan hann fór á loft í lítilli flugvél í Nevada fylki í Bandaríkjunum í gær. Frá þessu er greint á vefsíðu dagblaðsins Record-Courier í Bandaríkjunum.

Fosset fór á loft á lítilli einshreyfilsflugvél af gerðinni Citabria frá búgarði í Nevada fylki í gær. Að sögn heimildarmanna bandarísku fréttastofunnar CNN var vél Fosset með nægt eldsneyti til að vera á lofti í 4 til 5 klukkustundir. Hann var ekki með fallhlíf um borð.

Bandaríska flugumferðarstjórnin hefur staðfest að vél Fosset sé týnd og leit sé hafin að honum. Hann var ekki í fjarskiptasambandi á meðan hann var á lofti og ekki með fyrirliggjandi flugáætlun. Ekkert neyðarkall hefur borist frá vélinni.

Steve Fosset varð heimsfrægur þegar hann varð fyrstu manna til að fara hringinn í kringum jörðina í loftbelg árið 2002. Hann er 63 ára gamall og hefur sett 115 heimsmet í ferðalögum á loftbelgjum, flugvélum og seglbátum svo fátt eitt sé nefnt.