Ætla að leggja niður kjarnorkuver sín

Norður-Kóreustjórn ætlar að leggja niður kjarnorkuver sín fyrir árslok. Á sama tíma berast fréttir af því að Bandaríkjamenn séu að undirbúa árás á Íran.

Bandarísk og norður-kóreskstjórnvöld hafa setið á tveggja daga fund í Genf þar sem kjarnorkumál þeirra síðarnefndu hafa verið rædd. Norður-Kóreumenn höfðu áður fallist á að binda enda á kjarnorkuvæðingu landsins gegn efnahagslegri aðstoð. Þeir slökktu á kjarnakljúfi Yongbyon kjarnorkuversins í júlí samkvæmt samkomulaginu.

Christopher Hill, aðstoðarutanríkisráðherra Bandaríkjanna, tilkynnti svo í dag að samkomulag hefði náðst um að kjarnorkuverin yrðu lögð niður. Eftir á að útfæra nákvæmlega hvernig Norður-Kóreumenn standa að lokuninni en það verður kynnt síðar í þessum mánuði.

Á meðan að Norður-Kóreumenn eru að komast í náðina hjá Bandaríkjamönnum berast þær fréttir að Bandaríkjamenn séu að undirbúa árás á Íran. Vefútgáfa breska blaðsins Sunday Times greindi frá því í dag að ráðamenn í Pentagon, varnarmálaráðuneyti Bandaríkjanna, séu búnir að gera nákvæmar áætlanir um öfluga loftárás á tólfhundruð skotmörk í Íran. Markmið þeirra er að tortíma her og hergögnum Írana á þremur dögum.

Íranar hafa þrátt fyrir þrýsting Bandaríkjamanna ekki viljað hverfa frá kjarnorkuáætlun sinni. Ahmedinejad forseti Írans tilkynnti í dag að náðst hafi mikilvægur áfangi í kjarnorkuáætlun Írana og Íranar hafi nú þrjú þúsund skilvindur til að auðga úran. Íranar segjast ætla að nota úranið til að framleiða raforku en einnig er hægt að nota það til að framleiða kjarnorkuvopn.