Báðu þjóð sína afsökunar

Nítján suður-kóreskir gíslar, sem voru í haldi Talibana í Afganistan í sex vikur, báðu þjóð sína afsökunar í dag á öllum vandræðunum sem þeir orsökuðu.

Hópurinn samanstóð upphaflega af tveimur körlum og tuttugu og einni konu. Fólkið fór fyrr í sumar á vegum kristilegra samtaka til hjálparstarfa í Afganistan. Stjórnvöld í Suður-Kóreu lögðust alfarið gegn því að fólkið færi í þessa ferð en hjálparstarfsmennirnir létu það sig engu varða.

Karlmennirnir tveir sem voru í hópnum voru myrtir og tveimur af konunum var sleppt snemma í ágúst. Þeim nítján konum sem eftir voru var sleppt fyrr í vikunni eftir langar og strangar samningaviðræður.

Gíslarnir voru þreytulegir við komuna til Suður-Kóreu í dag. Þeir sögðust miður sín og báðu þjóð sína afsökunar á öllum þeim vandræðum sem ferð þeirra hefur leitt af sér.

Háttsettur Talibani í Afganistan sagði í gær að suður-kóresk stjórnvöld hefðu greitt rúman einn milljarð íslenskra króna fyrir lausn gíslanna og að peningarnir yrðu notaðir til vopnakaupa. Suður-kóresk stjórnvöld neita því hins vegar alfarið að hafa greitt fyrir lausn gíslanna.