Átök á Norðurbrú vegna Ungdómshússins

Sextíu og þrír voru handteknir í óeirðum á Norðurbrú í Kaupmannahöfn í nótt. Þúsund ungmenni söfnuðust saman til að minnast þess að hálft ár var í gær liðið frá því að Ungdómshúsið var rifið.

Í morgun hefur verið unnið að hreinsun á Norðurbrú í Kaupmannahöfn eftir óeirðirnar í gærkvöldi. Þær brutust út í kjölfar mótmæla sem efnt var til í minningu Ungdómshússins svokallaða, en í gær var hálft ár liðið frá því að húsið var rifið. Skemmdir og verksummerki eru sögð í líkingu við mótmælin þá.

Um þúsund ungmenni söfnuðust saman rétt fyrir miðnætti í gærkvöldi, við götuna þar sem Ungdómshúsið stóð. Mótmælendurnir lokuðu fyrir umferð um Norðurbrúargötu. Líkt og áður í mótmælaaðgerðum á Norðurbrú loguðu götueldar og kveikt var í ruslagámum. Nokkrir mótmælenda létu greipar sópa í verslunum eftir að hafa mölbrotið rúður þeirra. Varningur úr verslununum var í sumum tilfellum nýttur á bálköstinn. Múrsteinum og bensínsprengjum var auk þess kastað að lögreglu. Lögregla þurfti að kalla til aukin liðsstyrk og táragasi var beitt til að dreifa mótmælendum.

Af þeim sextíu og þremur sem voru handteknir í nótt verður gæsluvarðhalds krafist yfir að minnsta kosti sautján. Hinir handteknu eru meðal annars kærðir fyrir að beita lögregluna ofbeldi.

Danskir fjölmiðlar segja að tólf hinna handteknu sé konur og að tveir séu undir fimmtán ára aldri. Sextíu og þriggja manna hópurinn verður yfirheyrður í dag.