Larry Craig ætlar að segja af sér

Bandaríski öldungardeildarþingmaðurinn Larry Craig mun segja af sér á morgun í kjölfar þess að upp komst um handtöku hans fyrr í sumar. CNN greinir frá þessu og segir að Craig muni hverfa úr embætti 30. september næstkomandi. Craig er þingmaður fyrir Idaho fylki og það kemur í hlut ríkisstjórans þar að tilnefna eftirmann hans sem verður nær örugglega rebúblikani eins og Craig.

Larry Craig hefur verið mikið í fréttum vestanhafs eftir að hann var handtekinn á klósettinu á flugvellinum í Minneapolis þar sem hann sýndi kynferðislega tilburði í garð annars karlmanns. Hann viðurkenndi sekt sína þegar hann var handtekinn af lögreglunni á flugvellinum en hefur síðan reynt að draga í land í yfirlýsingum í vikunni. Þingmaðurinn hefur verið undir miklum þrýstingi um að segja af sér, ekki síst frá samflokksmönnum hans í rebúblikanaflokknum.