Hermaður svarar til saka fyrir fjöldamorð í Írak

Bandarískur hermaður svarar nú til saka fyrir morð á sautján óbreyttum íröskum borgurum, sem voru skotnir til bana á eða við heimili sín í Írak fyrir tveimur árum. Á meðan deila bandarískir stjórnmálamenn um veru Bandaríkjahers í Írak.

Blóðbaðið í íraska bænum Haditha í nóvember 2005 hófst með því að bandarískur hermaður lét lífið í vegsprengju. Deilt er um hvort einhverjir Írakar hafi veitt mótspyrnu í kjölfarið en þegar byssurnar þögnuðu lágu 24 óbreyttir Írakar í valnum, karlar, konur og börn. Liðþjálfi, sem talinn er vera höfuðpaurinn í málinu, er sakaður um að hafa ruðst inn í hús - óður yfir dauða félaga síns í vegsprengjunni - og skotið tvær konur og nokkur börn þar sem þau hjúfruðu sig saman uppi í rúmi.

Bandaríska þingið tekur upp umræður um framtíð hersins í Írak á næstu vikum. Innbyrðis deilur Íraka - bæði milli sjía og súnnía - og á milli andstæðra hópa sjía - hafa sjaldan verið meiri og fréttir af sprengjutilræðum og fjöldamorðum eru daglegt brauð.

Nú er talið að fleiri en sjötíu þúsund óbreyttir borgarar hafi látið lífið í átökum í Írak síðan í innrásinni 2003.